நீதிமானாகிய ஆபேலின் இரத்தம் முதல் தேவாலயத்துக்கும் பலிபீடத்துக்கும் நடுவே நீங்கள் கொலைசெய்த பரகியாவின் குமாரனாகிய சகரியாவின் இரத்தம்வரைக்கும், பூமியின்மேல் சிந்தப்பட்ட நீதிமான்களின் இரத்தப்பழியெல்லாம் உங்கள்மேல் வரும்படியாக இப்படிச் செய்வீர்கள் (மத். 23:35).
For audio podcast of this Manna Today, please click the link, https://youtu.be/Fn7TxMTyJTk
யூதர்களுடைய வேதபுத்தகத்தில் ஆதியாகமம் முதல் புத்தகமாகவும், நாளாகம புத்தகம் கடைசி புத்தகமுமாகக் காணப்படுகிறது. 24 புத்தகங்கள் கொண்ட அவர்களுடைய எபிரேய வேதபுத்தகம் மூன்று பகுதிகளாக பிரிக்கப்பட்டிருக்கிறது. முதல் 5 ஆகம புத்தகங்களை தோரா என்றும், இரண்டாவது தீர்க்கதரிசிகளின் புத்தகங்களை எட்டாக இணைத்து நவியீம் என்றும், மூன்றாவது, மற்ற எழுத்துக்கள் அடங்கிய 11 புத்தகங்களை இணைத்து கெதுவிம் என்றும் பிரித்திருக்கிறார்கள். நம்முடைய வேதபுத்தகத்தில் இரண்டு பகுதிகளாய்க் காணப்படுகிற சாமுவேலின் புத்தகம், இராஜாக்களின் புத்தகம் மற்றும் நாளாகம புத்தகங்கள் எபிரேய வேதத்தில் ஒரே புத்தகமாக இணைக்கப்பட்டுள்ளது. அதுபோல் சிறிய தீர்க்கதரிசிகளின் 12 புத்தகங்களும் இணைத்து ஒரே புத்தகமாகக் காணப்படுகிறது. எஸ்றா மற்றும் நெகேமியா புத்தககங்களும் ஒரே புத்தகமாக எபிரேய வேதத்தில் கொடுக்கப்பட்டுள்ளது. ஆக எபிரேய வேதத்தில் காணப்படுகிற 24 புத்தகங்கள், நம்முடைய பரிசுத்த வேதத்தின் பழைய ஏற்பாட்டின் 39 புத்தகங்களாய்க் காணப்படுகிறது.
இயேசு, ஆபேலின் இரத்தம் முதல் தேவாலயத்துக்கும் பலிபீடத்துக்கும் நடுவே நீங்கள் கொலைசெய்த பரகியாவின் குமாரனாகிய சகரியாவின் இரத்தம் வரைக்கும் என்று சொன்ன வேளையில், ஆதியாகம் முதல் நாளாக புத்தகம் வரைக்கும் காணப்படுகிற எபிரேய வேதத்தின் முதல் புத்தகத்தையும், கடைசி புத்தகத்தையும் குறிப்பிடுகிறார். ஆண்டவர் பழைய ஏற்பாட்டு இரத்தசாட்சிகள் அத்தனை பேரையும் அவர் மேற்கோள் காட்டுவதை அறியமுடிகிறது. கர்த்தர், நன்றி நிறைந்த இருதயத்தோடு காணிக்கைச் செலுத்தின ஆபேலையும் அவன் காணிக்கையையும் அங்கீகரித்து ஏற்றுக் கொண்டார். அவன் சகோதரனாகிய காயீன் பொறாமை கொண்டு அவனை கொலைசெய்தான். தன் சகோதரனைப் பகைக்கிற எவனும் மனுஷ கொலைபாதகனாயிருக்கிறான் என்று 1 யோவான் 3:15 கூறுகிறது. இயேசுவின் சீஷர்கள் என்று அறியப்படுகிற நாம் ஒருவருடைய நற்பெயரைக் கெடுப்பது கூட கொலைச் செய்வதற்கு ஒப்பாகக் காணப்படுகிறது. பழைய ஏற்பாட்டில் கடைசி இரத்தசாட்சியாய் மரித்த சகரியா, ஆசாரியனாகிய யோய்தாவின் குமாரன். யோய்தாவின் மனைவி யோசேபியாத், அத்தாலியாள் யோவாசை கொலைசெய்யாதபடிக்கு பாதுகாத்தாள். பின்பு அவன் 7 வயதாய்க் காணப்பட்ட வேளையில் யோய்தா அவனை ராஜாவாக்கினான். ஆனால் சகரியாவின் தாயும், தகப்பனும் தனக்குப் பாராட்டின ஈவை மறந்து, யோவாஸ் அவர்களுடைய குமாரனாகிய தீர்க்கதரிசி தன்னுடைய பாவங்களுக்கு விரோதமாய் பேசினதினால் அவனைக் கர்த்தருடைய ஆலயபிரகாரத்தில் கொன்றுபோட்டான். இயேசு பரகியாவின் குமாரனாகிய சகரியா என்பதின் மூலம் சிறிய தீர்க்கதரிசன புத்தகத்தை எழுதின சகரியா என்று கருதக்கூட வாய்ப்புகள் காணப்படுகிறது. ஆனால் சிறிய தீர்க்கதரிசியாகிய சகரியா ஆலயப்பிரகாரத்தில் கொலை செய்யப்பட்டான் என்று எழுதப்டவில்லை. இன்றைக்கும் இந்த இரத்தசாட்சிகளின் எண்ணிக்கை பெருகிக்கொண்டு காணப்படுகிறது.
கர்த்தருடைய பிள்ளைகளே, நன்றியில்லா உலகத்தில் வாழ்ந்து கொண்டிருக்கிறோம். மிஷனரிகள் தங்கள் ஜீவனை கிரயமாய்க் கொடுத்து நம்மை இரட்சிப்பிற்கு ஏதுவாய் நடத்தினதையும், கல்விக்கண்களைத் திறந்ததையும் மறந்து விட்டோம். உண்மையாய்க் கர்த்தரை தொழுதுகொள்ளுகிறவர்களையும், தியாகமாய்க் கர்த்தருடைய பணியைச் செய்கிறவர்களையும் புரிந்துகொள்ளாமல் வேதனைப் படுத்துகிற பெயரளவு கிறிஸ்தவர்கள் திரளாய்க் பெருகிவிட்டார்கள். அனேகர் இரத்தப்பழிகளைச் சுமக்கிறவர்களாய்க் காணப்படுகிறார்கள். நீங்கள் அப்படிப்பட்டவர்களாய்க் காணப்படாதபடிக்கு வேண்டிய கிருபைகளை கர்த்தர் பரத்திலிருந்து உங்களுக்கு தந்தருளுவார்.
கர்த்தர் தாமே உங்கள் ஒவ்வொருவரையும் ஆசீர்வதிப்பாராக. ஆமென்.
Pastor. David
Word of God Church
Mobile +974-55264318
Doha – Qatar
www.wogim.org
https://youtube.com/uthamiyae