காரியங்களை வாய்க்கப்பண்ணுகிறவர்.

உன் வழியைக் கர்த்தருக்கு ஒப்புவித்து, அவர்மேல் நம்பிக்கையாயிரு, அவரே காரியத்தை வாய்க்கப்பண்ணுவார்(சங்கீதம் 37:5).

உங்கள் வழியைக் கர்த்தருக்கு ஒப்புவித்து அவர்மேல் நம்பிக்கையாயிருங்கள்; அவரே காரியங்களை வாய்க்கப்பண்ணுகிறவர். அவர் ஆராய்ந்து முடியாத பெரிய காரியங்களையும், எண்ணிமுடியாத அதிசயங்களையும் செய்கிறவர். அவர் உன்னை அதிசயமாய் வழிநடத்தி உன் காரியங்களையும் வாய்க்கும்படி செய்வார்.

கர்த்தர் உசியா ராஜாவின் காரியங்களையெல்லாம் வாய்க்கும்படி செய்தார்.

உசியா தனது பதினாறு வயதில் யூதாவின் மேல் அரசனாகி ஐம்பத்திரண்டு வருஷம் அரசாண்டான். அவன் கர்த்தரின் பார்வைக்குச் செம்மையானதைச் செய்து, தேவனைத் அதிகமாகத் தேடினப்படியினால், கர்த்தர் அவனுக்கு அநுகூலமாகி அவனுக்கு எதிராயிருந்த எல்லாச் சத்துருக்களையும் நீக்கிப்போட்டார். எல்லாக்காரியங்களிலும் கர்த்தர் அவனுக்கு துணைநின்றார், இதனால் அவனுடைய கீர்த்தி எகிப்தின் எல்லைமட்டும் எட்டினது, அவன் மிகவும் பலங்கொண்டான். அவன் எருசலேமில் கோபுரங்களையும், அலங்கங்களையும் கட்டி பலப்படுத்தினான். மேலும் அவனுக்குப் பள்ளத்தாக்கிலும் சமபூமியிலும் அநேகம் ஆடுமாடுகளும், மலைகளிலேயும் வயல்வெளிகளிலேயும் பயிர்க்குடிகளும், திராட்சத்தோட்டக்காரரும் உண்டாயிருந்தபடியினால், அவன் வனாந்தரத்திலே கோபுரங்களைக் கட்டி, அநேக துரவுகளை வெட்டினான், அவன் வெள்ணாண்மைப் பிரியனாயிருந்தான். யுத்த செனைகளையும் சம்பாதித்தான். இந்தச் சேனையிலுள்ளவருக்கெல்லாம் உசியா கேடகங்களையும், ஈட்டிகளையும், தலைச்சீராக்களையும், மார்க்கவசங்களையும், வில்லுகளையும், கல்லெறிகிற கவண்களையம் ஆயத்தப்படுத்தினான்.
கோபுரங்கள்மேலும் அலங்கக் கோடிகள்மேலும் நின்று அம்புகளையும் பெரிய கற்களையும் பிரயோகிக்கிறதற்கு நிபுணரான தொழிலாளிகள் கற்பித்த யந்திரங்களையும் அவன் எருசலேமில் உண்டாக்கினான், அப்படியே அவன் கீர்த்தி வெகுதூரம் பரம்பிற்று, அவன் பலப்படுமட்டும் ஆச்சரியமாய் அவனுக்கு அநுகூலமுண்டாயிற்று(2 நாளா 26:14,15) அவன் கர்த்தரையே அதிகமாய் நம்பினப்படியினால், அவனுடைய எல்லாக் காரியங்களையும் கர்த்தர் வாய்க்குப்படி செய்தார்.

கர்த்தர்மேல் நம்பிக்கைவைத்து, கர்த்தரைத் தன் நம்பிக்கையாகக் கொண்டிருக்கிற மனுஷன் பாக்கியவான்(எரேமியா 17:7) இவர்கள் செய்யும் எல்லாக் காரியத்தையும் கர்த்தர் வாய்க்கப்பண்ணுகிறார். நம்பிக்கையோடு கர்த்தரை அதிகமாய் தேடுங்கள், உங்கள் வாழ்க்கையை அவர் கையில் ஒப்புவியுங்கள், செம்மையான வழியில் உத்தமமாய் நடவுங்கள், அவர் சமூகத்தில் அமர்ந்து காத்திருங்கள்; அவர் உன் இருதயத்தை ஸ்திரப்படுத்துவார். நீ நம்புவது அவராலே வரும், நீ நினைத்திராத நாட்களில் கர்த்தர் பெரிய காரியங்களை செய்வார், நீ அறியாததும் உனக்கு எட்டாததுமான பெரிய காரியங்களை செய்வேன்(எரேமியா 33:3) என்பது கர்த்தருடைய வார்த்தை. திடமனதாயிருந்து கர்த்தர் சமூகத்தில் உங்களை ஒப்புக்கொடுங்கள் அவரே காரியங்களை வாய்க்கும்படி செய்வார்.

கர்த்தர் தாமே உங்கள் ஒவ்வொருவரையும் ஆசீர்வதித்து உயர்த்துவாராக.

நம்முடைய கர்த்தராகிய இயேசுகிறிஸ்துவின் கிருபை உங்களனைவரோடுங்கூட இருப்பதாக. ஆமென்

David .P
Word of God Church
Doha – Qatar
www.wogim.org