நீதி 19:17. ஏழைக்கு இரங்குகிறவன் கர்த்தருக்குக் கடன்கொடுக்கிறான்; அவன் கொடுத்ததை அவர் திரும்பக் கொடுப்பார்.
ஏழைக்கு இரங்குகிறவன் கர்த்தருக்குக் கடன்கொடுக்கிறான் என்றால் கடன் கேட்கிற எல்லாருக்கும் கொடுக்கவேண்டும் என்று அர்த்தமில்லை. சிலர் சுகபோகமாக உல்லாசமாக வாழ்வதற்கு கடன் கேப்பார்கள், சிலர் குடித்து குடித்து காசை காலிசெய்து பின்பு தங்கள் குடும்ப தேவைக்கு கேப்பார்கள், சிலர் வேண்டாத நட்புகளை வைத்துக்கொண்டு கடன் கேப்பார்கள், சிலர் பெருமைக்காக மற்ற திருமணகாரியங்களுக்கு மொய் செய்யும்படி கடன் கேப்பார்கள், சிலர் சொத்துகளை வாங்குவதற்கு கடன் கேப்பார்கள், சிலர் மற்றவர்கள் கார் வாங்கிவிட்டார்கள் ஆகையால் நானும் வாங்கவேண்டும் என்ற பெருமைக்காக கடன் கேப்பார்கள். அப்படிப்பட்டவர்களுக்கு அல்ல, மாறாக செய்யத்தக்கவர்களுக்கு நாம் செய்ய வேண்டும். மத்தேயு 25:34-46ஐ வாசிக்கும்போது இயேசு இப்படிப்பட்டவர்களுக்கு உதவி செய்யவேண்டும் என்று குறிப்பிட்டிருக்கிறார். பசியுள்ளவர்கள், தாகமுள்ளவர்கள், அந்நியர், வஸ்திரமில்லாதவர்கள், வியாதிபட்டவர்கள், காவலிலடைக்கப்பட்டவர்கள் போன்றோருக்கு நாம் உதவி செய்யவேண்டும். அப்பொழுது, அவர் அவர்களுக்குப் பிரதியுத்தரமாக: மிகவும் சிறியவர்களாகிய இவர்களில் ஒருவனுக்கு நீங்கள் எதைச் செய்யாதிருந்தீர்களோ, அதை எனக்கே செய்யாதிருந்தீர்கள் என்று மெய்யாகவே உங்களுக்குச் சொல்லுகிறேன் என்பார்.
தரித்திரருக்குக் கொடுப்பவன் தாழ்ச்சியடையான்; தன் கண்களை ஏழைகளுக்கு விலக்குகிறவனுக்கோ அநேக சாபங்கள் வரும் (நீதி 28:27) என்று வசனம் சொல்லுகிறது. நான், எனக்கு , என் குடும்பம், என் காரியம் என்ற சுயத்தோடு வாழ்ந்து தன் கண்களை ஏழைகளுக்கு விலக்குகிறவனுக்கோ அநேக சாபங்கள் வரும். உன் ஆகாரத்தைத் தண்ணீர்கள்மேல் போடு; அநேக நாட்களுக்குப் பின்பு அதின் பலனைக் காண்பாய் (பிர 11:1) என்ற வசனத்தின்படி உங்கள் சம்பாத்தியத்தில் முடிந்த அளவிற்கு தண்ணீர்கள் மேல் அதாவது முடியாத மக்கள் மீது, ஏழைகள் மீது போடுங்கள். அதன் பலனை அநேக நாட்கள் கழித்து கழித்து நீங்களும் உங்கள் பிள்ளைகளும் பெறுவீர்கள்.
சீஷன் என்னும் நாமத்தினிமித்தம் இந்தச் சிறியரில் ஒருவனுக்கு ஒருகலசம் தண்ணீர் மாத்திரம் குடிக்கக் கொடுக்கிறவனும் தன் பலனை அடையாமற்போகான் என்று மெய்யாகவே உங்களுக்குச் சொல்லுகிறேன் என்றார் (மத் 10:42).
கர்த்தருடைய கிருபை உங்களோடு கூட இருப்பதாக. ஆமென்.
Robert Jegadheesh. R
Word of God Church
Doha – Qatar
www.wogim.org