யோனா 3 : 1 இரண்டாந்தரம் கர்த்தருடைய வார்த்தை யோனாவுக்கு உண்டாகி.
For audio podcast of this Manna Today, please click the link, https://youtu.be/-83n0YgEkDM
நாம் ஒருமுறை தோல்வியடையும்போது, கர்த்தர் நமக்கு இரண்டாவது வாய்ப்பை அளிக்கிறார் என்பதை நினைத்து அவரைத் துதிப்போம். யோனாவின் புத்தகத்திலிருந்து நமக்குக் கிடைக்கும் சிறந்த செய்திகளில் இதுவும் ஒன்று. நீங்கள் கர்த்தருக்கு முன்பாகத் தோல்வியடைந்திருக்கிறீர்களா? உங்களுக்கு மற்றொரு வாய்ப்பை அளிக்க தேவன் காத்திருக்கிறார். இரண்டாவது முறையும் அவரிடம் தோல்வியடைந்துவிட்டீர்களா? அவர் உங்களுக்கு மூன்றாவது வாய்ப்பையும் தருவார். அவர் இரண்டாவது வாய்ப்பை மட்டும் தரும் தேவன் அல்ல, ஏனெனில் நம்மில் பலர் நமக்குக் கிடைத்த இரண்டாவது வாய்ப்பை எப்போதோ வீணடித்துவிட்டோம் . எத்தனை முறை நீங்கள் தோல்வியடைந்திருந்தாலும், அவர் ‘மற்றொரு’ வாய்ப்பை அருளும் தேவன்! நீங்கள் மனதார மனந்திரும்பினால், கர்த்தர் இப்போதும் உங்களைச் சீர்படுத்தி, அவருக்கான ஊழியத்தை நிறைவேற்ற உங்களைப் பலப்படுத்த முடியும் என்பதை அறிந்துகொள்ளுங்கள்.
நினிவே என்ற பெரிய நகரத்தின் ஒவ்வொரு தெருவிலும் “40 நாட்களில் நினிவே அழிக்கப்படும்” என்று அறிவித்துக்கொண்டு நடக்க அவருக்கு மூன்று நாட்கள் பிடித்தது. ஆச்சரியப்படும் விதமாக, நினிவே மக்கள் உடனடியாக மனந்திரும்பினார்கள். யோனாவின் பிரசங்கம் ஒரே ஒரு வாக்கியத்தைக் கொண்டதாக இருந்தது. ஆனால் அது ஆயிரக்கணக்கானோரின் மனதை மாற்றியது. அவர்கள் அனைவரும் மனந்திரும்பினார்கள்.
இங்கே நாம் எதைக் கற்றுக்கொள்ளுகிறோம் ? தேவன் தம்முடைய ஊழியக்காரனைச் செம்மைப்படுத்தி, அவனுக்குள் ஒரு வேலையைச் செய்து முடித்திருக்கும்போது, அவனது வாயிலிருந்து வரும் ஒரு வாக்கியம் கூட மிகுந்த வல்லமையைக் கொண்டிருக்கிறது.
ராஜா முதல் பிச்சைக்காரன் வரை அனைவரும் அழுது மனந்திரும்பினார்கள். அவர்கள் சாக்குத்துணிகளை அணிந்துகொண்டு, தங்களை மன்னிக்குமாறு தேவனை நோக்கிக் கூப்பிட்டார்கள். தாங்கள் நியாயந்தீர்க்கப்படப் போகிறோம் என்பதை அவர்கள் அறிந்திருந்தார்கள். தேவன் அதைக் கண்டபோது, அவர்களைத் தண்டிக்கவில்லை.
நினிவே போன்ற ஒரு பொல்லாத நகரம் மனந்திரும்பியபோது தேவன் இரக்கமுள்ளவராக இருந்தார். சில ஆண்டுகளுக்குப் பிறகு அந்த நகரம் மிகவும் பொல்லாததாக மாறிவிடும் என்பதையும், அதனால் அதை அழிக்க வேண்டியிருக்கும் என்பதையும் தேவன் அறிந்திருந்தார். ஆனால் தேவன் ஒவ்வொருவரையும் அவர்கள் கடந்த காலத்தில் எப்படி இருந்தார்கள் என்றோ அல்லது எதிர்காலத்தில் எப்படி இருப்பார்கள் என்றோ பார்க்காமல், அவர்கள் இப்போது எப்படி இருக்கிறார்களோ அப்படியே நடத்துகிறார். அவருடைய பெயர் “நான் இருக்கிறவராகவே இருக்கிறேன்” என்பதுதான்; “நான் இருந்தேன்” என்றோ “நான் இருப்பேன்” என்றோ அல்ல. நம்மைவிட தேவன் அதிக இரக்கமுள்ளவர். வேதத்தில், ஒரு நபர் மனந்திரும்பி தேவனிடம் வந்தும், தேவன் அவரை மன்னிக்காத ஒரு சம்பவம் கூட இல்லை. யூதாஸ்காரியோத்து ஆண்டவரிடம் சென்று மன்னிப்பு கேட்டிருந்தாலும், அவனுக்கு மன்னிப்பு கிடைத்திருக்கும்.
தேவன் நினிவேயின் மீது இரக்கம் காட்டியபோது, யோனா மகிழ்ச்சியடைந்திருப்பார் என்று எண்ணினால், அவர் மகிழ்ச்சியடையவில்லை. 1,20,000-க்கும் மேற்பட்ட மக்கள் (4:11) கொண்ட ஒரு முழு நகரமே அழுது மனந்திரும்புவதைப் பார்க்கும் ஒரு சுவிசேஷகரை, வரலாற்றிலேயே மிகப்பெரிய எழுப்புதலைக் காணும் ஒருவரை, கற்பனை செய்து பாருங்கள். ஆனால் யோனா மகிழ்ச்சியடையவில்லை! அதற்குப் பதிலாக யோனா கோபமடைந்தார். முதலாவதாக, அவருடைய தீர்க்கதரிசனம் நிறைவேறாததால். இரண்டாவதாக, தேசப்பற்றுள்ள ஒரு இஸ்ரவேலராக, அவர் நினிவே மக்களை வெறுத்தார்; அவர்கள் மனந்திரும்பாமல் இருக்க வேண்டும் என்றும், தேவன் அவர்களை அழிக்க வேண்டும் என்றும் அவர் விரும்பினார்.
நாம் யோனாவைப் போல இருக்கிறோமா? தேவன் ஆசீர்வதிக்கக் கூடாது என்று நீங்கள் விரும்பும் நபர் யாராவது பூமியில் இருக்கிறார்களா? நாம் நரகத்திற்கு மட்டுமே தகுதியானவர்களாக இருந்தபோதும், தேவன் நம்மிடம் எவ்வளவு இரக்கமுள்ளவராக இருந்து நம்மை ஆசீர்வதித்திருக்கிறார் என்பதை நாம் மறந்துவிட்டோமா? ஆனால் யோனாவோ, ஒரு தீர்க்கதரிசியாகத் தனது சொந்த கௌரவத்தை குறித்தே கவலைப்பட்டான்.
யோனாவுக்கு ஒரு பாடத்தைக் கற்பிக்க, கர்த்தர் அவர் தலைக்கு மேலே ஒரு செடி வளரச் செய்தார். அந்தச் செடியைக் கண்டு யோனா மிகவும் மகிழ்ச்சியடைந்தார். ஆனால் மறுநாள், தேவன் ஒரு புழுவைக்கொண்டு அந்தச் செடியை உண்ணச் செய்ததால், அது வாடிப்போனது. சூரியன் தன் மீது கடுமையாக எரிந்ததால் யோனா மீண்டும் மிகவும் கோபமடைந்தார்; “நான் வாழ்வதைவிட மரிப்பதே மேல்” என்று கூறினார். அப்பொழுது தேவன் யோனாவிடம், ” நீ பிரயாசப்படாததும், நீ வளர்க்காததும், ஒரு இராத்திரியிலே முளைத்ததும், ஒரு இராத்திரியிலே அழிந்துபோனதுமான ஆமணக்குக்காகப் பரிதபிக்கிறாயே.வலதுகைக்கும் இடதுகைக்கும் வித்தியாசம் அறியாத இலட்சத்து இருபதினாயிரம்பேருக்கு அதிகமான மனுஷரும் அநேக மிருகஜீவன்களும் இருக்கிற மகா நகரமாகிய நினிவேக்காக நான் பரிதபியாமலிருப்பேனோ என்றார் ” என்று கேட்டார் (4:10,11). நினிவேயிலிருந்த அநேக மிருகங்களைத் தவிர, ஒரு லட்சத்து இருபதாயிரத்திற்கும் மேற்பட்ட அப்பாவிக் குழந்தைகளின் மீதும் தேவன் கொண்டிருந்த அக்கறையை இது வெளிப்படுத்துகிறது. நினிவேயிலுள்ள மிருகங்களின் மீது தேவன் காட்டிய அக்கறையைக் காண்பது வியப்பாயிருக்கிறது.
இந்த வசனத்தில் தொலைந்துபோன ஆத்துமாக்கள் மீது தேவன் கொண்டிருக்கும் அளவற்ற இரக்கத்தை நாம் காண்கிறோம். தேவன் உலகத்தின் மீது மிகுந்த அன்பு கூர்ந்து, யாரும் அழிந்துபோகாதபடிக்குத் தம்முடைய ஒரேபேறான குமாரனைத் தந்தருளினார். நமக்கு ஆண்டவர் இரண்டாவது மூன்றாவது என்று பல வாய்ப்புகளை கொடுக்கும்போதே அவருடைய இரக்கம் எவ்வளவு பெரியது என்பது நமக்கு புரிகிறதல்லவா ?
கர்த்தர் தாமே உங்கள் ஒவ்வொருவரையும் ஆசீர்வதிப்பாராக. ஆமென்.
Robert Jegadheesh. R
Word of God Church
Doha – Qatar
www.wogim.org